Rey berüv "Kıyiv raqamlı" qullanımında keçirile. Darnitsa rayonında yerleşken Zaslonova soqağınıñ adını Ğenadiy Afanasyevniñ şerefine deñiştirmek içün şeer sakinleriniñ 38% rey berdi, onıñ diger variantlar arasında eñ büyük destegi bar. Berilgen malümatqa köre, rey berüv mayısnıñ 12-nde yekünlenecek.
Aqmescitli fotoqraf ve uquqçı Ğenadiy Afanasyevniñ adı "Qırım terroristleri" davasınıñ mabüsi olğanından soñ belli oldı. 2014 senesi o, Rusiyeniñ Qırım ilhaqına qarşı çıqqan edi, bundan soñ FSB hadimleri tarafından Aqmescitte terroristik areketlerni azırlağanında qabaatlanıp tutuldı. O vaqıt onıñnen beraber bu davanıñ diger mabüsleri de yaqalandı. Halqara uquq qoruyıcı teşkilâtlar bu davanı siyasiy dep adlandırdı. O, 767 kün apiste yatqan edi.
2016-2018 seneleri Ğenadiy Afanasyev Rusiye apishanesinden azat etilgen soñ Qırım.Aqiqat müellifi edi.
2022 senesi dekabrniñ soñunda Afanasyevniñ Lugansk vilâyetinde elâk olğanı belli oldı. O, Ukrayina Silâlı quvetleriniñ 241 brigadasınıñ 130-ıncı batalyonında cenkleşti. Afanasyev, Rusiyeniñ Ukrayinağa arbiy istilâsınıñ birinci künü arbiy komissarlıqqa ketti.
Aprelniñ 11-nde belli oldı ki, Ğenadiy Afanasyev III derece ukrayin cesürlik nişanı ile taqdirlendi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
