Kıyivde fevral 20-27 künleri "Azat Qırımğa mektüpler" teşebbüsi çerçivesinde "Sens" kitap tükânında Rusiye akimiyeti tarafından maküm etilgen ve Rusiye apishanelerinde tutulğan qırımlı siyasiy mabüslerge 214 mektüp yazıldı. Bu aqta martnıñ 4-nde Ukrayina prezidentiniñ Qırım Muhtar Cumhuriyetindeki Temsilciliginde bildirdiler.
"Biz, kimligi içün küreşken, Ukrayinağa qoltutqan ve muqavemet köstergen insanlarnıñ destegine 214 mektüp topladıq, şimdi olar işğal memuriyetleri tarafından qanunsız şekilde cezalandırılalar, Ukrayinada ise "qırımlı siyasiy mabüsler" olaraq tanılalar", — dep aytıla haberde.
Müessisede, bu teşebbüs Qırımnıñ işğalden azat etilmesine ve Rusiye akimiyeti tarafından taqip etilgen bütün siyasiy mabüslerniñ azat etilmesine qadar devam etecek, dep hatırlattılar.
2023 senesi çeçek ayında Ukrayinada "Serbest Qırımğa mektüpler" aktsiyası başlandı. Onıñ maqsadı Kremlniñ ukrayinalı esirleri aqqında hatırlatmaq, em de olarğa destek köstermek ve ifade etmek. Bundan da ğayrı, mektüpler Rusiye apishaneleriniñ memuriyetlerine er bir Ukrayina vatandaşı müim olğanını ve cemiyet olarnıñ apishanede tutuluv şaraitlerini nezaret etkenini köstere.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
