Kıyivde Rusiyedeki seferberlik vaqtında Qazahistan ve Özbekistanda sığınaq qıdırğan qırımtatarlarnıñ qıyınlıqları aqqında ikâye etken Aynur Koskinanıñ "Qırım kervanı" filmini kösterecekler.
Film Rusiye akimiyetiniñ işğal etilgen topraqlardaki ve Rusiyedeki milliy toplulıqlarğa munasebetini añlata.
Rejissörnıñ özüniñ qayd etkeni kibi, qırımtatarlarnıñ mecburiy öz-özüni sürgün etmesi aqqında aytıp berme ğayesi, Ukrayinada Rusiyeniñ ateşke tutmaları neticesinde zarar körgen mekteplerniñ ve bala bağçalarınıñ eski alına ketirilmesi içün para ile yardım etken göñülli teşkilât olğan "Azatlıq melekleri" klubunda körüşüva vaqtında kelgen. Seferberlik ilân etilgen soñ anda adamlar kelip başlağan.
"2022 senesi sentâbr ayında qısmiy seferbelik ilân etilgen soñ olarnıñ Rusiye tarafından işğal etilgen Qırımnı terk eterek Qazahistanğa ne içün kelgenleri pek yahşı añlayışlı degil edi. Olarnen laf etken soñ ve olarnıñ ikâyesini eşitken soñ olarnıñ ne qadar qıyın vaziyette olğanlarını añladım. İnsanlarnıñ taqdiri vastasınen bütün bir halqnıñ faciasını köstermek içün qırımtatarlarnıñ ikâyesini aytıp bermege istedim. Böylece mümkün qadar çoq insan bunı bilsin", - dep ayttı Koskina.
Al-azırda filmniñ qaramanları Qazahistannıñ tışındalar, amma çekiş gruppası olarnen alâqa saqlamağa devam ete. Olarnı işğalden azat etilgen Qırımğa qaytuv aqqındda bir film çıqarmaq arzusı birleştire.
"Qırım kervanı" filminiñ kösterilüvi dekabrniñ 8-nde saa 16:00-da "Lira" kinoteatrinde olacaq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
