Kıyivde gece yapılğan Rusiye ücüminde elâk olğanlarnıñ sayısı arta, dep bildirdi şeer arbiy memuriyetiniñ başı Timur Tkaçenko.
Yazıq ki, bugünki ücümniñ qurbanlarınıñ sayısı arttı. Bugünge qadar 20 elâk olğan kişi aqqında belli, dep yazdı memur telegramda.
Oraqnıñ 2-ne keçer gecesi Rusiye 74 raketa ve 496 türlü dron qullanıp, Ukrayinağa büyük qarışıq darbe endirdi. Ukrayina Arbiy-ava quvetleriniñ malümatına köre, ücümniñ esas yönelişi Kıyiv edi. Ukrayina arbiyleri 33 yerde 25 ballistik raketa ve 12 ücüm dron urulğanını qayd etti, 18 yerde ise dron tüşti.
Oraqnıñ 3-nde Kıyivde Rusiye Federatsiyasınıñ kütleviy ücüm qurbanlarınıñ hatırasına matem ilân etildi.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.