Kıyivde Qırımtatar resurs merkezi tamır qırımtatar halqınıñ Rusiye-Ukrayina cenkindeki iştirakini añlatqan ''Qırım askeri'' filminiñ taqdimini keçirdi, dep haber ete ''Supilne''.
Bu vesiqalı film Ukrayina Silâlı quvetlerinde hızmet etken qırımtatarlar ile yapılğan bir qaç intervyüden ibaret. Qaramanlarnen intervyülerniñ bir qısmı anonim şaraitinde yazıldı, çünki bir qaç arbiy hızmetçiniñ tuvğanları işğal etilgen Qırımda buluna.
Filmniñ qaramanlarından biri olğan ''Qırım'' bölüginiñ komandanı İsa Akayev, bu vesiqalı filmniñ em Ukrayinadaki cenkke, em de qırımtatar halqına eñ çoq diqqat celp etecegine ümüt besley.
''Filmni begendim, yahşı çıqtı. Mence, küreşimiz aqqında daa çoq böyle şeyler aytmaq kerek. Biz biri-birimizni tanımaq kerekmiz. Ve biri-birini tamamlamaq kerekmiz. Ümüt etem ki, bu film biz, yani qırımtatarlarğa eñ çoq diqqat celp eter. Ve Ukrayinadaki cenkke de. Çoqusı insanlarnıñ Rusiyeniñ tek Ukrayina ve qırımtatarlar içün duşman olmağanını añlamalarını pek isteyim. Bu Rusiye imperiyasınıñ terkibinde bulunğan bütün halqlarnıñ duşmanıdır", - dep ayttı Akayev.
Daa evel Qırım.Aqiqat "Sessiz sürgünlik" leyhasını taqdim etken edi. Film qırımtatarlarnıñ Qırımdan sürgün etilüvi aqqında. Filmniñ qaramanları öz ayat ikâyelerini, Rusiye tarafından ilhaq etilgen yarımadanı nasıl terk etkenlerini, neler başlarına kelgenini, ne içün qalmağa çare yoq olğanını, şimdi qayda ve nasıl yaşağanlarını ve Qırımğa qaytıp olamaycaqlarını ikâye ettiler.
Olarnı apiske aldılar, işkencege oğrattılar, taqip ettiler, ölümnen qorquzdılar. Olar Rusiye ordusında buluna bile ediler. 1944 senesiniñ tarihı tekrarlana: o vaqıt sovet akimiyeti qırımtatarlarnı zornen yük vagonlarında alıp ketti, şimdi ise Rusiye Qırımnıñ tamır halqınıñ vekillerini evlerini terk etmege mecbur ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
