Kıyivde qırımtatar qadınları Ramazan ayı devamında aqşam yemegi olğan iftarda iştirak etti. Tedbir "Qırım cebesi" hayriye teşebbüsiniñ ve Qırımtatar Milliy Meclisiniñ destegi ile teşkil etildi, dep haber ete QIRIM.News.
"Aqşamlıq qırımtatar qadınlarını, köçip kelgenlerni, siyasiy mabüslerniñ apaylarını, arbiylerni, ocalarnı, göñüllilerni ve faallerni bir yerde topladı", — dep yaza neşir.
"Qırım cebesiniñ" vekili Polina Neşeretniñ qayd etkeni kibi, bu kibi tedbirler "tek Qırım tışında ananelerni saqlap qalmaq imkânı degil de, aynı zamanda işğal etilgen yarımadada şimdi olğanlarnı dünyağa hatırlatmaq içün bir fırsattır".
"Bu birleşmek, körüşmek, qırımtatarlarımız — erkekler ve qadınlar — esirlikte, Rusiye apishanelerinde bulunğanı aqqında acele suallerni muzakere etmek içün bir daa bir fırsattır", — dep qayd etti o.
Martnıñ 21-nde Qırımtatar Milliy Meclisi Ukrayina Tış işler nazirligi ile beraber Tış işler nazirligi yanındaki Diplomatik akademiyasında beraberlikte iftarnı keçirgen edi.
Kollektiv iftarlar aftada bir qaç kere Ramazan devamında keçirile, dep bildire Qırımtatar Milliy Meclisi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
