Mayısnıñ 17-nde Kıyivdeki Açlıq müzeyinde qırımtatar sürgünliginiñ 80 yıllığına bağışlanğan "Qırımtatar halqınıñ genotsidi ve onıñ aqibetlerini yeñüv yolları" adlı dialog keçirilecek.
Tedbirni "Golodomor-genotsid" Milliy müzeyi, "Qırımtatar Resurs Merkezi" ve Ukrayina milliy hatıra institutı teşkil eteler.
Munaqaşa vaqtında tarih ilimleri namzeti Andriy İvanets ve Qırımtatar resurs merkeziniñ idare reisi Eskender Bariyev çıqışta bulunacaqlar.
"Dialog devamında qırımtatarlarğa qarşı nasıl ve ne içün genotsid yapılğanını muzakere etecekmiz. Qırımtatar Milliy Meclisiniñ azası Eskender Bariyev dünya devletleri tarafından Qırımnıñ tamır halqınıñ sürgünliginiñ genotsid olaraq tanılması ceryanınıñ nasıl ilerlegenini tarif etecek", — dep aytıla haberde.
1944 senesi mayıs 18-de sovet rejimi bütün qırımtatar halqını Qırımdan Orta Asiyağa sürgün etmege başladı. Üç kün devamında onlarnen demir yol vagonları ile tahminen 200 biñ qırımtatar zorbalıqnen çıqarıldı.
Er yıl Qırımda qırımtatar halqı sürgünliginiñ qurbanlarını añma künü munasebetinen kütleviy tedbirler, şu cümleden Qırım paytahtınıñ merkezinde matem mitingi keçirile. Amma Qırım yarımadası Rusiye tarafından işğal etilgen soñ, Aqmescit merkezinde bu kibi aktsiyalarnıñ keçirilmesi yasaq etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
