Altıncı "Qırım inciri" edebiy yarışınıñ mukâfatlav merasimi Kıyivde Armannıñ 21-inde saat 18:30-ta olacaq. Teşkilâtçılarnıñ aytqanına köre, bu aynı adlı festivalniñ esas vaqiası olacaq.
Tedbir devamında çeşit nominasiyalarda ğalipler ilân etilecek ve Ukrayin ve Qırımtatar tillerinde eñ yahşı eserler içün mukâfatlar berilecek. Bu yılki ananeviy esas çıqışnı Ukrayin-Qırımtatar intellektual dialogında bir şahs yapacaq. Evelki yıllarda bu çıqışnı Nariman Celâl, Ada Rogovtseva, Timoti Snayder ve Yevğen Glibovıtskıy yapqan ediler
Altıncı yarışnıñ jüri azaları: Alim Aliyev, İvan Andrusâk, Katerına Kalitko, Andriy Kurkov, Anastasiya Levkova, Bekir Mamut, Mayye Safet, ve Mamure Çoban. Merasimde finalistler de olacaqlar.
Festivalniñ programması eki künge planlaştırılğan ve "Sens" kitap tükânında munaqaşalar, edebiy oquvlar ve icadiy körüşüvlerden ibarettir.
İştirakçiler Qırımnıñ dekolonizasiyası, onıñ cenübiy edebiy ölçüsi, halqara mediada bulunması, işğal altında Qırımtatar edebiyatınıñ inkişafı aqqında laf etecekler.
Mukâfatlandıruv merasimi tek yarışnıñ yekünlenüvi degil de, edebiyat vastasınen Qırımnıñ zemaneviy baqışını açqan, cenk, işğal, hatıra ve medeniy miras tecribesini añlağan müelliflerni de qayd etme imkânı olacaq.