Kıyivde urıp tüşürilgen Rusiye pilorsız uçağınıñ parçaları neticesinde Solomensk rayonında yanğın çıqtı, doquz insan, şu cümleden bala zararlandı. Bu aqta ukrayin paytahtınıñ başı Vitaliy Kliçko bildirdi.
"Solomensk rayonındaki bir evniñ içinde endi doquz yaralanğan kişi bar. Olarnıñ arasında 11 yaşında bir qızçıq da bar. Episi tibbiy yardımğa muhtac oldı. Yanğın söndürildi", — dep yazdı Kliçko Telegram kanalında.
Aynı şu rayonda, viranelerniñ tüşmesi neticesinde memuriy binada yanğın çıqtı. Yanğın söndürildi, yaralanğanlar yoq, dep bildirdi şeerniñ arbiy memuriyetiniñ başı Serğiy Popko.
Onıñ aytqanına köre, ava mudafaası vastaları oktâbrniñ 30-na keçken gecesi Kıyivge ücüm etken bütün dronlarnı urıp tüşürdi. Bu oktâbrniñ başından berli on doquzıncı ücümdir, dep qayd etti Popko.
Bir kün evelsi Rusiye ordusı Harkiv ve Kıyivge ücüm etkenleri aqqında haber etilgen edi. Neticede dört insan elâk oldı, daa beş kişi yaralandı.
Rusiye arbiyleri çeşit silâlardan muntazam sürette ukrayin regionlarına ücüm ete.
Rusiye yolbaşçılığı, Rusiye ordusı Ukrayinanıñ şeer ve köyleriniñ grajdan infrastrukturalarına, vatandaş ealisini öldürgenine ve hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
