Keçende Kyivde yarımadanıñ ve Ukrayina tamır halqlarınıñ medeniy çeşitligine bağışlanğan "Kitap-seyaat. Qırım Ukrayinadır" leyhasınıñ taqdim merasimi olıp keçti. Bu leyha çerçivesinde "Qırım elifbesi" resim sergisi açıldı ve munaqaşa paneli olıp keçti.
Qayd etilgenine köre, "Qırım elifbesi" resim sergisi balalar ve büyükler içün eki — ukrayin ve qırımtatar tillinde yapılğan. Elifbeniñ er bir arfi yarımadanıñ medeniy çeşitligi ve tamır halqları aqqında tarif etecek. Sergi kelecek eki afta devamında Gulliver ticaret-eglence merkeziniñ ekinci ve üçünci qatlarında çalışacaq.
"Bugün Qırım Ukraina qısmı olğanı aqqında hatırlatmaq pek müimdir. Biz tek bu adaletsiz işğalni hatırlamaq degil de, öz aqları ve serbestligi içün küreşmege devam etken Ukrayina tamır halqlarına qol tutmaq kerekmiz. Olarnıñ sesleri eşitilmeli, birdemligimiz ise sarsılmaz olmalı", — dep qayd etti leyhanıñ müellifi İrına Taranenko.
Panel munaqaşaları devamında spikerler tasil meselelerini, hususan Qırım ve tamır halqlarnıñ tarihını ögrenüv, mekteplerde ve dersliklerde onı ögretüv, em de qırımtatar tiline qol tutuv müimligini muzakere ettiler.
"Er bir halq öz tilini, yalıñız öz etrafında laf etilse, saqlap olamaz. Ukrayin ya da qırımtatar tili olsun, amma cemiyette laf etilmese, til saqlanmaz. Ümüt etem ki, ada azat etilgende, qırımtatar tili, Qırım toprağınıñ tili, devlet ukrayin tili ile bir derecede eşitilecek, cemiyette de laf etilecek. Akis alda onı saqlap olamaycaqmız", — dep qayd etti Qırımtatar Milliy Meclisiniñ reisi Refat Çubarov.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
