Kıyivde kiçik aynıñ 28-nde Mihail Dragomanov adına Ukrayina devlet universitetinde Qırım işğaline tirenüv Kününe bağışlanğan "Ukrayinada azatlıq cenki kontekstinde Qırımnıñ tirenüvi" mevzusında tögerek masa keçirilecek.
Tögerek masanıñ teşkilâtçıları Mihail Dragomanov adına Ukrayina devlet universiteti, "Aleksandr Yaremenko adına içtimaiy-uquqiy ve siyasiy tedqiqler institutı" Oquv-analitik merkezi, Qırımtatar resurs merkezi, Qırımtatar halqı Meclisi, Vladimir Dal adına Şarqiy Ukrayina milliy universiteti.
Tedbirde iştirak etmek içün alimler, ocalar, aq qorçalayıcılar, devlet hadimleri, jurnalistler ve cemaat erbapları davet etile. Tedbir saat 12:00-ge planlaştırılğan. Qayd etüv tafsilâtları mütenasip malümat kâğıtında derc etilgen. Tögerek masanıñ neticesinde tezilser cıyıntığı çıqacaq.
Evel, Qırımtatar resurs merkezi kiçik aynıñ 27-nde Qırım işğaline tirenüv Kününe bağışlanğan "Qırım qarşılıq köstere" sergisiniñ açılışını ilân etkeni haber etilgen edi.
Qırımnıñ işğaline tirenüv künü — kiçik aynıñ 26-nda qayd etilgen hatıra künüdir. 2014 senesi bu künü Aqmescitte Qırımtatar Milliy Meclisi tarafından teşkil etilgen Ukrayina topraq bütünligine qoltutuv mitingi olıp keçti. Aktsiya Rusiye işğaline qarşılıq kösterüvniñ esas epizodlarından biri oldı.
2020 senesi Ukrayina prezidenti öz fermanınen içik aynıñ 26-nı Qırım Muhtar Cumhuriyeti ve Aqyar şeeriniñ işğaline tirenüv kösterüv resmiy künü olaraq tasdıqlap, yarımadanıñ Ukrayina suverenitetine qaytarılması içün küreşniñ müimligini qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
