Yanvarniñ 1-nde saba Kıyivde "Şahedler" tarafından yapılğan ücüm neticesinde zarar körgenlerniñ sayısı dört insanğa arttı, dep bildirdi Ukrayina paytahtınıñ meri Vitaliy Klıçko.
"Şimdiki vaqıtta paytahtqa yapılğan duşman ücümi neticesinde dört kişi yaralandı. Ekisi hastahanege alındı. Eki ekim anda yardım etti. Zarar körgenlerniñ çoqusı Peçersk rayonından", — dep qayd etti yerli memur.
Onıñ malümatına köre, Svâatoşinsk rayonında tramvay deposından 100 metr mesafede tramvay yolları zarar kördi.
"Qurtarıcılar işlerini bitire, ve yollarnı tamir etmege başlaylar. Üç tramvaynıñ camları da zarar kördi", — dep ayttı şeer başı.
Daa soñra ücüm neticesinde yaralanğanlarnıñ sayısı 6 insanğa qadar arttı, ekisi hastahanege alındı, dep qayd etti Klıçko. Onıñ bildirgenine köre, "diger zarar körgenlerge, şu cümleden, hamile qadınğa, ekimler yardım etti".
Rusiye arbiyleri Ukrayina regionlarına çeşit silâlarnen muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
