Kıyivniñ "Jovten" kinoteatrinde iyün 2-de "Docudays UA" Halqara insan aqları aqqında vesiqalı film festivali çerçivesinde Qırım.Aqiqat (Azatlıq Radiosı) leyhasınıñ "Sessiz sürgünlik" vesiqalı filmi kösterilecek.
Tedbir saba saat 10:00-da başlanacaq. Film kösterilgen soñ, film müellifleri iştiragi ile açıq munaqaşa keçirilecek: Mitriy Julay rejissör-ssenarist; Nikita İsayko operator; Anjelika Rudenko jurnalist-muharrir; Elvina Seitbullayeva prodüsser.
Tedbirde qırımtatar halqınıñ lideri, Ukrayina halq deputatı Mustafa Cemilev, Qırım meseleleri eksperti Yuliya Tişçenko, Qırımtatar Milliy Meclisiniñ reisi Refat Çubarov da çıqışta bulunacaq.
Qırım.Aqiqatnıñ vesiqalı leyhası "Sessiz sürgünlik" qırımtatarlar Qırımdan nasıl sürgün etilgenleri, Rusiye qırımtatarlarnı kene nasıl evsiz qaldırğanı aqqında film. Ne içün qırımtatarlar öz vatanlarını kütleviy surette terk etmege mecbur, ne içün Qırım yarımadasınıñ tamır halqına 1944 senesi sovet akimiyeti qırımtatarlarnı zorbalıqnen yük vagonlarında alıp ketken kibi, başqa çare qaldırmaylar.
Qaramanlar öz ayat ikâyelerini, Rusiye tarafından ilhaq etilgen Qırımnı nasıl terk etkenlerini, neler keçkenlerini, ne içün qalmağa imkânları olmağanını, şimdi qayda ve nasıl yaşağanlarını ve Qırımğa qayta bileceklerini ikâye ettiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
