Ukrayina qanun qoruyıcı organları bugünge qadar Kıyiv vilâyetinde Rusiye ordusı tarafından yapılğan arbiy cinayetlerniñ 1200 faktını qayd etti. Bunı Ukrayina İç işçler naziri Denıs Monastırskıy bildirdi.
"Cenk devamında 600-den ziyade diversant yaqalandı. Eñ çoq arbiy cinayet Kıyiv vilâyetinde qayd etilgen, şimdilik 1200", - dedi o.
Monastırskıynıñ sözlerine köre, azat etilgen şeerlerde pek çoq patlamağan mayın, patlayıcı maddeler qalğan. Ukrayina Fevqulâde vaziyetler devlet hızmetiniñ hadimleri tek tünevin 5000 nesne tapıp, zararsızlaştırğan.
Monastırskıy adamlarnı şeerlerine qaytmağa aşıqmamağa çağırdı, çünki bu yerler "daa bayağı telükeli".
Aprelniñ 3-nde saba jurnalistler ve Ukraina akimiyeti Kyivniñ şimaliy-ğarbindeki Buça şeeriniñ soqaqlarında elâk olğan onlarnen insan aqqında bildirdi. Qolları bağlı ölgen vatandaşlarnıñ fotoresimlerini Reuters, UNİAN, AFP agentlikleri tarafından derc etildi. Ukraina ordusı şeerni azat etti, Rusiye ordusı çekildi.
Rusiye Mudafaa nazirligi Kıyiv civarındaki Buçada öldürilgen barışıqsever insanlarnıñ fotoresim ve videolarını «daa bir provokatsiya» ve «Kyiv rejiminiñ ğarbiy kütleviy haber vastaları içün bir sanalaştırması» dep adlandırdı.
Ukraina Tış işler naziri Dmıtro Kuleba Halqara cinaiy mahkemesini Buçağa missiya yollamağa çağırdı. «Halqara cinaiy mahkemeni ve halqara teşkilâtlarnı Buçağa ve Kyiv vilâyetiniñ azat etilgen diger şeer ve köylerine missiya yollamağa çağıram, Ukraina uquq qoruyıcılarınen beraber rusiyelilerniñ cenk cinayetlerini isbatlaycaq bütün deliller daa tafsilâtlı toplanmalı», – dep qayd etti o.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
