Kıyiv şeer şurası Kıyivdeki bir sıra obyektlerniñ adlarını deñiştirdi, dep haber etti aprelniñ 15-nde şeer başı Vitaliy Kliçko.
"Bugün Kıyiv şeer şurası bir sıra şeer obyektleriniñ adlarınıñ deñiştirilmesini qabul etti, olarğa dair qarar leyhaları artıq azırlanğan ve kerekli protseduralandan keçirilgen", - dedi o.
Kliçkonıñ sözlerine köre, o, Kıyiv ve Moskva arasındaki dostluq aqqında keçmiş skverniñ adınıñ Mariupol Qaramanları skverine deñiştirilmesi aqqında qarar leyhasını teklif etken. Kıyiv şeer şurasınıñ deputatları bu teklifke qoltutqanlar.
"Kıyivde alâ daa işğalciniñ adı ile bağlı onlanca soqaq ve obyektler bar. Olarnıñ adınıñ deñiştirilmesi aktualdir. Şunıñ içün soqaqlarğa, caddelerge, metro stantsiyalarına ve diger obyektlerge yañı adlar azırlaycaqmız. Bunı mayısnıñ 9-naca yapmağa isteymiz. Azırlarmız ve Kıyiv şurasınıñ oturışında birden epsini qabul etermiz", - dedi o.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
