Kreml nezareti altındaki Qırım baş naziriniñ muavini İgor Mihayliçenko “terrorcılıq ve ekstremiz ile küreş”ni quvetleştirmege çağırta. Bu aqta o bir kün evel, Qırımda “Hizb ut-Tahrir” teşkilâtınıñ iştirakçilerinde yapılğan kütleviy tintüvlerden soñ, tefsir bergende ayttı, dep bildire Qırım akimiyetiniñ matbuat hızmeti.
Mihayliçenkonıñ aytqanına köre, ekstremizm ve terrorcılıq ile küreşte “bütün müessise ve hızmetleriniñ tertipli ve mıqayt çalışması” kerek.
“Men cumhuriyet başınıñ noqta-i nazarına qoltutam - memurlarnı, matbuatnı, diniy erbaplarnı, cemiyet ve tasil teşkilâtlarını “ekstremizmnen küreşke” qoşmağa kerek. Tek birleşip biz buña qarşılıq kösterip olurmız”, - dep yaza Mihayliçenkonıñ sözlerinden Qırım akimiyetiniñ matbuat hızmeti.
Haber etilgeni kibi, memur uquq qorçalayıcı organlarnıñ hızmetçilerine minnetdarlıqnı bildirdi.
Rusiye nezareti altındaki Aqmescit Kiyev rayon mahkemesi, martnıñ 28-inde kütleviy tintüvlerden soñ tutulıp alınğan 11 qırımtatar faalcilerine sıñırlav tedbirleriniñ saylamasını devam etecek.
Martnıñ 27-nde saba FSB, Rusiye İç işler nazirligi ve Rusiye gvardiyasınıñ hadimleri Rusiyede yasaqlanğan «Hizb ut-Tahrir» diniy teşkilâtında iştirak etkeninden şübheli sayılğan eñ az 25 insannıñ evinde tintüv keçire. «Qırım birdemligi» cemaat birleşmesiniñ haber etkenine köre, tahqiqat tedbirleri qırımtatarlar yaşağan evlerde keçirile.
Bavurçıda keçirilgen tintüv vaqtında semetdeşlerine qoltutmağa kelgenlerden eki kişi Eskender Mamutov ve Emil Ziyadinov da tutuldı. Bunıñ sebebi Rusiye uquq qoruyıcıları ve Bavurçı qasabasınıñ sakinleri arasında çıqqan qavğa oldı.
«Qırım birdemligi» cemaat birleşmesiniñ haber etkenine köre, Aqmescitniñ Bavurçı qasabasındaki Memet Appazov soqağında semetdeşlerine qoltutmağa kelgen 5 kişi tutuldı. Olarnıñ soyadları qayd etilmey.
Martnıñ 27-sinde Qırımnıñ rusiyeli başı Sergey Aksönov, FSB keçirgen kütleviy tintüvlerge “bütünley qoltutqanını” bildirdi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
