Aqmescitte qırımlılarnı 2020 senesi aprelniñ 22-nde Rusiye anayasası tüzetüvleriniñ qabul etüvine rey bermek içün kelmege çağırğan bir sıra banner peyda oldı. Bu aqta Qırım.Aqiqat mühbiri bildire.
«Memleketimiz, anayasamız, qararımız!» ve «Rusiye Merkeziy saylav komissiyası» yazıları ile onlarnen bannerni Aqmescitniñ Sevastopolskaya soqağında körmek mümkün.
Aynı metin ile bannerler cemaat naqliyatı duraqlarında ve bazı trolleybuslarda asıldı.
Cumaertesi künü, martnıñ 21-nde, işğal etilgen Qırımda koronavirusnen hastalanğan ilk insan bar dep tasdıqladılar. Bu aqta Rusiye kontrolindeki Qırım yolbaşçısı Sergey Aksenov bildire.
Qırımda martnıñ 17-nden başlap sport, eglence ve diger kütleviy tedbirlerniñ keçirilüvi yasaqlana. Aqyarda martnıñ 19-ndan başlap bütün mektepler qapatıla, aliy oquv yurtları ise martnıñ 16-nda uzaqtan tasilge keçti. Martnıñ 17-nden itibaren Aqyarda da «yüksek azırlıq rejimi» ilân etildi.
Qomşu Rusiyeniñ anayasa metnine deñişmeler kirsetmek teklifi memleketniñ prezidenti Vladimir Putinge aittir. Tüzetüvlerge köre, anayasağa yañı akimiyet organı kirsetile – Devlet şurası. Devlet dumasınıñ prezidentniñ teklifinen ükümet reisini, baş nazirniñ teklifinen ise baş nazir muavinleri ve muavinlerni tasdıqlamaq aqqı olmalı. Quvet müessiseleriniñ reberlerini prezident Federatsiya Şurasınen mesleatlar keçirip tasdıqlaycaq.
İşbu tüzetüvlernen Putinniñ prezidentlik yıllarını «sıfırlamağa» teklif etile, böylece Rusiye yolbaşçısı kene prezident vazifesine namzetini köstere bilecek.
Qanun leyhası anayasanıñ prezident yılları maddesinden «ardı-sıra» sözüni alıp taşlay. Anayasanıñ halqara añlaşmalardan üstün olğanını da pekitmege teklif etile.
Putinniñ tenqitçileri, tüzetüvlerniñ esas maqsadı Rusiyeniñ şimdiki prezidentine akimiyet başında qalmaq ola, dep bildire. Bu deñişmeler – Rusiye akimiyet sisteması tarihında eñ büyük islâattır. Olarnı qabul etmezden evel prezident buyruğınen ilân etilecek umumhalq Rusiye rey berüvinde qoltutmağa teklif etildi. Tüzetüvler baarde qabul etile bile.
İşçi gruppa tüzetüvlerniñ qabul etilüvine dair umumhalq rey berüvini aprelniñ 22-nde yapmağa teklif etti.
Gruppanıñ reisdeşi Andrey Klişasnıñ qayd etkenine köre, bu künni tatil dep ilân etmek kerek.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
