Emil Kürbedinovnıñ advokatı Aleksey Ladin Aqmescitniñ Kiyev rayon mahkemesinde çıqışta bulunıp, cinayet olmağanı içün dava qapatılmalı, dedi, dep bildire Qırım.Aqiqat mühbiri.
Ladin 2013 senesi Qırımda «Ukraina uquqı bar edi, oña köre bu timsaller yasaq altında degil. Cinayet işlemek kibi bir niyet de yoq edi», dep hatırlattı.
Mahkeme adise eski olğanına baqmadan, memuriy davanı qapatmaq muracaatını red etti. Ladin qayd etti ki, «bir aydan soñ Kürbedinovnı şimdi tapılğan beş yıl evelsi paylaşqanları içün mahküm etseler, şaşırmaz».
Daa bir advokat Edem Semedlâyev bildirdi ki, Rusiye uquq qoruyıcıları internet saifesiniñ Kürbedinovğa ait olğanını ve beş yıl evelsi olğan paylaşuvlar adiy qullanıcılar içün açıq olğanını isbatlamadı.
Daa evel haber etilgeni kibi, mahkeme binası ögünde qırımlı advokat Emil Kürbedinovğa qoltutmaq içün insanlar toplaşa.
Dekabrniñ 7-nde mahkeme Kürbedinovnıñ davasını baqmağa devam ete. Advokat Rusiye Memuriy cinayetler kodeksiniñ 20.3 maddesi boyunca (natsist işaretleri ya da timsalleri, ekstremist teşkilâtlarnıñ işaretleri ya da timsalleri, ya da federal qanunlarnen yasaqlanğan işaret ve timsalleriniñ teşviqatı ve açıq numayış etilmesi) qabaatlana.
Advokat 2013 senesi Facebookta paylaşqanları içün memuriy apis cezasını ala bile. Kürbedinovnıñ zenaatdaşları dey ki, onı Dimaşqqa köçken Qırımnıñ sabıq sakini şikâyet etti. Kürbedinov oturışuvdan soñ onı «olmaycaq bir sebepten» tutqanlarını aytıp, ekstremizm qabaatlarını tanımağanını bildirdi. Bundan ğayrı, o, emin ki, tutulmasınıñ kerçek sebebi onıñ aq qorçalayıcı faaliyeti, siyasiy mabüslerge köstergen yardımı ve Ukraina askeri Bogdan Nebılitsanı qorçalağanı ola.
Rusiye uquq qoruyıcıları tarafından tutulğan qırımlı advokat Emil Kürbedinovnıñ davasında şaatlardan biri Rusiye FSB hadimi Andrey Suşko ola. O, qırımtatar faali Renat Paralamovnıñ hırsızlanması ve azaplanmasında iştirak etken edi.
Keçenleri Suşko Paralamovnı hırsızlağanında şeklenip, ABD sanktsiyalar cedveline kirsetilgen edi.
Qırımdaki Rusiye İç işler nazirligi bu malümatnı izaatlamay.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
