Qırımnıñ Rusiye ükümeti reisiniñ muavini Svetlana Maslova bildirgenine köre, yerli suv anbarlarınıñ vaziyeti «sıñırlı» qala.
«Aqmescit şeerinde ve Aqmescit rayonında suvnı temin etmek içün er kün cedvel boyunca tahminen 120 biñ metr metr kub suv berile. Aqmescit ve Aqmescit rayonınıñ suv anbarlarında faydalı ve qullanıla bilecek suv kölemi: 3% faydalı kölem, Ayan suv anbarı: 55%, Partizan: 7%», – dep bildirdi Maslova aprelniñ 5-nde Qırımnıñ suv teminlevinen bağlı brifing vaqtında.
Onıñ aytqanına köre, umumen mezkür suv anbarlarından suv hattına tahminen 5,6 mln metr kub berile bile.
«Bir aftada 1,2 mln metr kub keldi. Masraflar – 271 biñ metr kub. Aqmescit şeeriniñ suv anbarlarından kelgen künlik orta suv seviyesi martnıñ 29-ndan aprelniñ 4-ne qadar 36,9 biñ metr kub oldı. Şimdi kelgen suv seviyesi deñişmese, ustteki suvlarnı qullanuv imkânı tek 140 künge yeter – yani dört aydan biraz ziyadesine», – dep ayttı Svetlana Maslova.
Onıñ qayd etkenine köre, yağğan yağanaqlarğa baqmadan, yarımada suv anbarlarınıñ toluv vaziyeti «deñişmedi».
Rusiye kontrolindeki Qırım akimiyeti keçken afta yerli telekanalnıñ yayınında Beşterek-Zuyadan Aqmescitke suv berilip başladı, dep bildirdi. «Voda Krıma» müessisesiniñ reberi bildirgenine köre, Qırımda suv anbarlarınıñ toluv vaziyeti aynı seviyede qalsa, aprel ayında Aqmescit sakinlerine suv berüv cedveli yımşatıla bile.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
