"Ukrain diversantlar davası" boyunca maküm etilgen Vladimir Dudka, Rusiye Yuqarı mahkemesi onıñ ve ekinci iştirakçi Aleksey Bessarabovnıñ ükmüni deñiştirir, dep ümüt etkenini aytıp berdi. Bu, Vladimir Dudka oğlu İlya Kavernikovğa mektübinde yazdı, dep bildire Qırım.Aqiqat mühbiri.
"Aqiqat yeñer dep küçük bir ümütim bar edi, amma olğanı kibi olacağını bile edim. Amma Tañrınıñ emri öyledir, demek men bundan keçmek kerekim, sen de ise mennen beraber", - denile Vladimir Dudkanıñ mektübinde.
İlyanıñ aytqanına köre, babası Aleksandr Bessarabovnen beraber alâ daa "Matrosskaya tişina" SİZOsında tutula, olarnıñ advokatı Oksana Jeleznâk ise, apellâtsiya mahkemesiniñ qararına kassatsiya şikâyetini azırlay.
2016 senesi noyabrniñ 9-nda Aqyarda «Nomos» Qırım analitik merkeziniñ hadimleri Dmitriy Ştıblikov, Aleksey Bessarabov ve yaqın dostu Vladimir Dudka tutulğan edi. Üçü de Ukraina istihbaratınıñ isteginen Qırımda diversiya azırlağanında qabaatlandı.
Rusiye kontrolindeki Aqyar şeer mahkemesi aprelniñ 4-nde «ukrain diversantları» davasınıñ» mabüsleri Vladimir Dudka ve Aleksey Bessarabovnı 14 yılğa üküm etti. Mahkeme er birine para cezasını da berdi: Dudkağa – 350 biñ ruble, Bessarabovqa – 300 biñ ruble.
Oktâbr 15-inde Rusiye Yuqarı mahkemesi imayeniñ şikâyetini red etip, Dudka ve Bessarabovnıñ ükmüni tasdıqladı.
