Bazar künü Köktöbel yanında Uzun Sırt (gora Klementyeva) dağında paraplancı, paraplannı idare etip olamayıp, yıqıldı ve yaralandı, dep bildire Rusiye nezaretindeki Qırım ükümetiniñ FVN-niñ matbuat hızmeti.
Beyanatqa köre, aqay öz küçünen qıbırdanıp olamay edi. Matbuat hızmetiniñ malümatına köre, qurtarıcılar, onı acele yardım maşnasına tahliye etti. Adamnı Kefe şeeriniñ №1 hastahanesine alıp kettiler.
Müessise başı Sergey Şahovnıñ aytqanına köre, 2019 senesiniñ başından berli, qurtarıcı hızmetlerniñ hadimleri, paraplancılarğa endi dört kere yardım etti.
