«Jurnalistlerni qoruv komiteti» halqara aq qorçalayıcı teşkilâtı Qırımdaki vatandaş jurnalistleri Osman Arifmemetov ve Rustem Şeyhaliyevge çıqarılğan Rusiye ükümlerini takbih etti. Rusiye qadılar kollegiyası olarnı 14 yılğa sert rejimli koloniyağa yollamağa qarar berdi.
«Qırımtatar jurnalistleri Osman Arifmemetov ve Rustem Şeyhaliyevge çıqarılğan canavar 14 yıllıq ükümler Rusiye akimiyetiniñ Qırımda olarnen razı olmağanlarnı yoq etmege niyetlengenlerini köstere», – dep bildirdi Gulnoza Said, Avropa ve Merkeziy Asiyada Jurnalistlerni qoruv komitetiniñ programma koordinatorı.
O, bu üküm Rusiyede ve işğali altındaki Qırımda matbuat serbestligine lâqayt olmağan er kes içün «telâşlı bir işaret olmalı», dep qoştı.
«Rusiye akimiyeti Arifmemetov, Şeyhaliyev ve diger matbuat vekillerini apisten azat etmeli», – dep ayta Gulnoza Said.
2022 senesi noyabrniñ 24-nde Rostov-na-Donudaki Cenübiy arbiy okrugınıñ mahkemesindeki reis qadı Vâçeslav Korsakov qadılar Denis Galkin ve İgor Şendrikovnen beraber mabüslerni terror faaliyetinde ve akimiyet zapt etmege tırışqanlarında qabaatladı. Faaller Enver Ametov ve Yaşar Muyedinov 13 yıl sert rejimli koloniyada, vatandaş jurnalistleri Ruslan Suleymanov, Rustem Şeyhaliyev ve Osman Arifmemetov 14 yıl koloniyada qalmasına üküm etildi. Mabüsler 4 yılnı apishanede keçirecek, soñra daa 1 yılğa areket serbestligi sıñırlanacaq. Mabüsler özüni qabaatlı olaraq tanımayıp, siyasiy taqip olğanını tüşüneler.
2019 senesi mart ayında Rusiye uquq qoruyıcıları Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetov ve Remzi Bekirov bar ediler.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
