Jurnalistlerni qoruv komiteti (CPJ) Rusiye akimiyetinden terrorizmde qabaatlanıp eki ayğa apiske alınğan qırımlı jurnalistler Rustem Osmanov ve Aziz Azizovnı azat etmesini talap ete. Bunı teşkilâtnıñ beyanatında aytıla.
CPJ hatırlattı ki, martnıñ 5-nde saba saat 4-te Bağçasarayda Rusiye FSB-siniñ hadimleri Qırımdaki siyasiy sebeplerden olğan davalarnı aydınlatqan "Qırım birdemliginiñ" eki jurnalistini tuttı. Bundan ğayrı, sekiz qırımtatar faali apiske alındı.
Aynı künü Aqmescitniñ Kiyev rayon mahkemesi jurnalistlerni mayısnıñ 5-ne qadar eki ayğa apiske almağa qarar berdi.
''Ukrayinanıñ Qırımında daa eki qırımtatar jurnalistini tutıp, Rusiye akimiyeti yarımadada insan aqları vaziyetini aydınlatmağa tırışqan mustaqil seslerni taqip etmege devam ete, - dep bildirdi CPJ programmasınıñ müdiri Carlos Martınez de la Serna. Akimiyet Rustem Osmanov ve Aziz Azizovğa qarşı bütün qabaatlavlarnı lâğu etmeli, olarnı deral azat etmeli ve qırımtatar jurnalistlerine qarşı repressiyalarnı toqtatmalı.
Martnıñ 5-nde saba Qırımda qırımtatarlarnıñ evlerinde kütleviy tintüvler keçirildi. Bağçasarayda taqiqat tedbirleri "Qırım birdemliginiñ" faalleri, Canköy rayonında ise diniy erbaplar tarafından keçirildi. Umumen 10 qırımtatarınıñ evinde tintüvler keçirildi.
Tintüvlerden soñ FSB eñ azından beş insannı tuttı, olarnıñ arasında sabıq imam Remzi Kurtnezirov bar. O, ekinci sınıf saqatı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
