Link açıqlığı

Saatnıñ esas haberi

Jurnalist Semena 2019 senesi iyül ayından soñ Qırımdan çıqa bile – advokat


Qırım jurnalisti Mıkola Semena
Qırım jurnalisti Mıkola Semena

Ukraina jurnalisti Mıkola Semena 2019 senesi iyül ayında işğal etilgen Qırımdan esas Ukrainağa çıqma imkânını ala bile. Bunı oktâbrniñ 2-nde jurnalistniñ advokatı Emil Kürbedinov Qırım.Aqiqatqa bildirdi.

Onıñ aytqanına köre, Mıkola Semena icra hızmetniñ yolbaşçısından mektüp aldı. Anda «çetelge çıqma» meselesi onıñ tarafından baqılmay, dep qayd etile. Mıkola Semenağa şartlı-müddetinden evel azat oluv qararını beklemege qala, dep qoştı advokat.

«İyül ayında şartlı ükümniñ yarısı bite. O, şartlı-müddetinden evel azat etilmek içün ariza bere bile. Qanaatlendirilse, bu ise mahkemede yapıla, raat çıqa bile», – dep ayta advokat.

Oktâbrniñ 2-nde belli olğanı kibi, Mıkola Semenağa işğal etilgen Qırımdan çıqıp, kardiologiya hastahanesinde tedaviylenmek içün Kyivge ketmege izin berilmedi.

Daa evel Ukraina jurnalistleriniñ milliy birligi, ukrain jurnalisti Mıkola Semenanıñ Kyiv şeerindeki kardiologiya hastahanesinde tedaviylenmesi içün olduqça тесир etmege ukrain akimiyetine ve halqara teşkilâtlarğa muracaat etti.

Bu muracaatnı Ukrain ombudsmenı Lüdmila Denisova, OSCE (Avropada havfsızlıq ve işbirlik teşkilâtı) ve Rusiyede insan aqları boyunca vekâletlisine yolladı.

2017 senesi sentâbr ayında Aqmescit mahkemesi Semenanı üç yılğa şartlı olaraq apiske alıp, üç yıl deñeme müddeti ve üç yıl devamında açıq faaliyet köstermesini yasaqlamağa talap etti.

Aynı o yılnıñ dekabr ayında Kreml nezareti altındaki Qırım Yuqarı Mahkemesi, açıq faaliyet yasağını eki yılğace qısqartıp, ükmüni qısmen yımşattı.

Mıkola Semena, öz maqalelerinde «fikir bildirüv serbestligini» eda etkenini ayta.

Ukraina Tış işleri nazirligi, AQŞ Devlet departamenti, Avropa Birligi ve bir sıra halqara teşkilâtları Mıkola Semenağa qarşı çıqarılğan qararnı taqbih ettiler.

Radio Free Europe/Radio Liberty prezidenti Tom Kent, jurnalist Mıkola Semenağa qarşı qabaatlavlarnıñ esassız olğanını söylep, Qırımda Kremlniñ kontroli altında bulunğan mahkeme tarafından çıqarılğan qarar lâğu etilmek kerek, dedi.

XS
SM
MD
LG