Qırımdaki Rusiye mahkemesi vatandaş jurnalisti ve emşire İrına Danılovıçnı yedi yılğa azatlıqtan marum etti, dep haber ete «Qırım esnası» aq qorçalayıcı leyhası.
Mahkeme qadınnı Rusiye Ceza kodeksiniñ 222.1 maddesine istinaden «Patlayıcı madde ya da patlayıcı cihazlarnı qanunsız satın aluv, berüv, satuv, saqlav, taşuv, yollav ya da yanında taşımasında» qabaatlı tanıdı.
Apis cezasından ğayrı qadın 50 biñ ruble para cezasını ödemeli. Mabüs ükümniñ manasını añlaymı sualine jurnalist red cevabını berdi, dep qayd ete «Qırım esnası».
Rusiye prokuraturası Danılovıç içün 7 yıl apis cezası ve 60 biñ ruble para cezası berilüvini talap etken edi.
Jurnalist dekabrniñ 27-nde mahkemede soñki sözüni aytıp, Rusiye FSBsi «kirli sahtelev usullarını» qullanğan ilk kişi degil dep, 2014 senesinden başlap Qırımda qaçırılğan insanlarnıñ soyadlarını ayttı. O, Qırım işğaliniñ ilk qurbanı olaraq adlandırılğan Reşat Ametovnı qayd etti. İrına Danılovıç böyle insanlar cedvelinde olacağını bekley edi, dep ayttı.
Daa evel mahkemede qadın Rusiye uquq qoruyıcıları tarafından tutulğan soñ işkencege oğratıldı, dep bildirdi.
Danılovıç emşire olıp çalıştı, içtimaiy ağlarda saifesi ve bir qaç bloger yazısı bar edi. Yazğanları esasen sağlıq hadimleri ve işğal altındaki yarımadada sağlıq problemlerinen bağlı edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
