Bu aqta onıñ yañı tayin etilgen yolbaşçısı Arsen Jumadilov Svoboda.Ranok (Azatlıq Radiosınıñ leyhası) yayınında ayttı.
Onıñ bildirgenine köre, Agentlik daa evel çalışıp başlasa edi, devlet bücetinden ordu içün berilgen 25 milliard ğrıvnâ farqlı qullanılır edi.
«Mudafaa nazirligi bu yıl devlet bücetine köre bütün bücet qararlarını yerine ketirdi. Qısqası – bu Programmağa köre ordu teminlevine berilgen para sarf etildi, tedarikçilernen añlaşmalar tizildi. Agentlik ertece çalışıp başlasa edi, 90 milliarddan eñ az 20-25 milliard ğrıvnâ Agentlik tarafından farqlı sarf etilir edi», – dep qayd ete Jumadilov.
Agentlik işiniñ başlatıluvını uzatuv Ukrayına Mudafaa nazirligi yolbaşçılarınıñ eskisi kibi çalışmaq isteginen bağlaymı sualine Jumadilov böyle cevap berdi:
«Bile-bile uzatqanlar, eskisi kibi yapmaq içün ya da nazirlikke has olğan idare paraliçi oldı, bunı aytıp olamayım. Uquq qoruyıcı organları çezsin. Nazir Reznikovğa çeşit şeyler aytıldı – bağda edik. Bir şey soramağa istegende menden soray edi. Amma bu bağ pek semereli oldı, dep aytıp olamayım», – dep ayta o.
Agentlik yolbaşçısı qayd etkenine köre, vazifege tayin etilmezden evel bir basqığa oğramadı.
«Oğramadım. Maña basqı yapmaq faydasız olğanı belli, dep tüşünem. Basqı yapmağa tırışqan kişi içün daa zararlı olur. Başqa strategiya daa faydalı oldı, uzaqtan uzatuv, yavaşlatuv, vesiqalarnı körmeme, suniy mania yapma, endi muzakere etilgen meselelerde qoşma toplaşuvlar – bu strategiya daa semereli, oña qarşı çıqmaq daa zor. Çünki siyasiy irade olmasa, er şey yavaş kete. Şimdi, ümüt etem ki, yañı nazir tayin etilgeninen siyasiy irade peyda olur. Çünki Mudafaa nazirliginde esas cemaat istegi satın aluv islâatlarınen bağlı», – dep qayd ete Jumadilov.
Devlet idarecisi ve qırımtatar erbabı Arsen Jumadilov 2015 senesinden 2023 senesine qadar Qırım.Aqiqatqa maqale yazğan edi. Bu yıl avgustnıñ 28-nde Ukrayına Mudafaa naziri olğan Oleksiy Reznikov onı Ukrayına Silâlı quvetleriniñ resurs teminlevi agentliginiñ yolbaşçısı olaraq tayin etti.
Sentâbrniñ 5-nde Ukrayına Yuqarı Radası Oleksiy Reznikovnı Ukrayına Mudafaa naziri vazifesinden çıqarmaq qararını qabul etti.
Ukrayına prezidenti Volodımır Zelenskıy memleketniñ mudafaa nazirini deñiştirmek niyetini tasdıqladı. O, nazirniñ em arbiylernen, em umumen cemiyetnen munasebetleriniñ yañı şekilleri kerek, dep ayttı. Oleksiy Reznikov yerini Devlet mülki fondunıñ yolbaşçısı Rustem Umerov almalı. Prezident parlament bu namzetke qoltutar, dep bekley.
Bu qarar müessisedeki ve nazirniñ emrinde olmağan arbiy komissarlıqlar sistemasındaki qabarcılıq qavğalarından soñ seslendirildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
