Amerika Birleşken Devletleri prezidenti Joseph Biden Ukrainağa daa 500 million dollarlıq iqtisadiy yardım kösterecek, dep bildirdi.
«Biz Ukraina ükümetine doğru iqtisadiy yardımğa qoşma 500 million dollar bermege azırmız», – dep bildirdi Biden. O, ABDniñ Ukrainağa köstergen umumiy iqtisadiy yardımı soñki eki ayda bir milliard dollar oldı, dep qoştı.
Onıñ aytqanına köre, Ukraina iqtisadiyatını stabilleştirmek içün bu paranı qullana bile.
Ukrainada Rusiye ordusı tarafından viran etilgen ya da zarar körgen mesken evlerniñ sayısı biñler oldı ve olarnıñ tam sayısını aytmağa imkânsızdır, çünki ateşler toqtamay. Ukraina iqtisadiyat naziri Yuliya Sviridenko martnıñ 28-nde Rusiye istilâsından kelgen zararnı 565 milliard dollar olaraq esapladı.
Ukraina cemiyet ve topraq naziri Aleksey Çernışevniñ malümatına köre, aprelniñ 2-ne qadar Rusiyeniñ Ukrainada başlatqan büyük istilâsı neticesinde aman-aman 6,8 biñ mesken ev viran etildi ya da zarar kördi.
Rusiyeniñ Ukrainadaki «mahsus operatsiyanıñ» maqsadı vatandaş obyektleri olmay degenine baqmadan, Rusiye Federatsiyasınıñ ordusı vatandaş ve sanayı alanlarına ateş açıp, infrastrukturağa büyük zarar ketire.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
