ABD prezidenti Joe Biden Rusiye prezidenti Vladimir Putinnen körüşip, Ukraina topraq bütünligine qol tuta, dep bildirdi. Bu aqta o, Jenevadaki sammit neticelerinen bağlı brifingde ayttı, dep yaza Azatlıq Radiosı.
«Birleşken Devletlerniñ Ukraina suvereniteti ve topraq bütünligine qol tutqanını ayttım. Minsk añlaşmalarını muzakere ettik. Minsk añlaşmalarınen bağlı fikrimni ayttım. O, (Vladimir Putin – muar.) inkâr etmedi. Amma, farqlar bar edi, ebet», – dedi Biden.
Vladimir Putin ABD prezidenti Joe Biden ile körüşken soñ yapqan matbuat konferentsiyasında Rusiyeniñ Ukrainanen bağlı tek bir mecburiyeti bar – Minsk añlaşmalarınıñ yerine ketirilmesine yardım etmek, dedi.
«Ukrainanı aytsaq, bu mevzu köterildi. Tafsilâtlı olğanını aytıp olamayım. Prezident Bidenni añlağanıma köre, Ukraina şarqındaki vaziyetniñ al etilmesiniñ temeli Minsk añlaşmaları olmalı. Ukrainanen bağlı mecburiyetlerimizni aytsaq, tek bir danesi bar – Minsk añlaşmalarınıñ yerine ketirilmesidir. Ukraina tarafı buña azır olsa, şübhesiz bu yoldan ketecekmiz», – dedi Putin.
NATO sammit neticesinde yapqan resmiy beyanatında Rusiyeniñ Minsk añlaşmalarına köre mecburiyetleri aqqında hatırlatıp, Ukraina sıñırları yaqınlarında askerlerniñ toplanmasını takbih etti.
İyünniñ 16-nda İsviçreniñ Jenevasında ABD prezidenti Joe Biden Rusiye prezidenti Vladimir Putinnen sammiti ötkerildi.
Körüşüv arfesinde Biden Putinni «sert» ve «lâyıq raqip» dep adlandırdı: «Rusiyenen qavğa etmege istemeyim, amma Rusiye duşman faaliyetini devam ettirse, cevap berecekmiz». ABD prezidentiniñ aytqanına köre, Putin ile körüşüvde «qırmızı sızıqlar» qayd etilecek.
Kreml, Putin Biden içün öz «qırmızı sızıqlarını» belgileycek, dep bildirdi.
Rusiye prezidenti böyle «qırmızı sızıqlardan» biri Ukrainanıñ Şimaliy atlantik ittifağına kirüv ihtimali ola, dep ayttı.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
