Avropa Birligi Rusiye qarşı yañı sanktsiyalar qoya bile. Bunı aprelniñ 11-nde Avropa Birliginiñ Tış işler yolbaşçısı Josep Borrell AB memleketleriniñ tış işler nazirleriniñ köşüvinde bildirdi.
"Sanktsiyalar daima mümkündir", - Reuters Borrellniñ aytqanlarından alıntı ketire.
Körüşüvde nazirler Halqara ceza mahkemesiniñ prokurorı Karim Han ile Ukrayinanıñ Rusiye ordusı tarafından işğal etilgen topraqlarında yapqan arbiy cinayetlerni muzakere etecek olalar. Börrelniñ sözlerine köre, olar Moskvağa qarşı kelecek adımlarnı da muzakere ete bileler.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
