ABD prezidenti Jo Biden bazar künü aqşam Ukraina devlet başı Volodımır Zelenskıy ile telefon laqırdısı vaqtında, Rusiyeniñ Ukrainağa istilâsı olğan taqdirde qatiy cevap berecegini vade etti.
"Prezident Biden açıq şekilde bildirdi ki, Rusiye kelecekte Ukrainağa istilâ etse, ABD ortaqları ve ittifaqdaşları ile beraber qatiy cevap berecek", - dep yazıla Beyaz evniñ resmiy beyanatında.
Biden ve Zelenskıy vaziyetni çezmek içün diplomatik alâqalarnı desteklediler, şu cümleden Rusiyeniñ NATO ve OSCE ile temasları vastasınen. Bundan ğayrı Biden, Vaşington Kyivniñ haberi olmadan Ukraina ile bağlı qararlar qabul etmeycegini vade etti.
Ukraina prezidenti Zelenskıy Jo Biden ile laf etken soñ, Ukraina ABD-niñ sarsılmaz destegine büyük qıymet bergenini bildirdi.
Daa olar Ukrainanıñ iç işlerini, şu cümleden islâatlarnı ve oligarhlarnen küreşni muzakere etkenler.
Dekabrniñ 30-nda, aqşam Rusiye ve ABD prezidenti Vladimir Putin ve Joe Biden telefonda laf ettiler. Eki prezidentniñ telefon subeti 50 daqqa devam etti.Subet Ukraina etrafındaki vaziyetniñ kerginleşmesinen bağlı edi.
Küzde kütleviy haber vastaları istihbaratnıñ malümatına esaslanıp, Ukraina sıñırında Rusiye ordusı toplana, dep bildirdi. ABD ve Ğarp memleketleri Moskva silâlı ücüm azırlay, dep tahmin etti. Kreml bu laflarnı inkâr etip, ABD ve NATOdan telükesizlik kefaletlerini talap etti – hususan, NATOnı şarqqa kenişletmemek ve eski sovet cumhuriyetlerini arbiy ittifaqnıñ yañı azaları sırasına almamaq.
