Qırımtatar asıllı ukrainalı yırcı Jamalanıñ «Virü v tebe» yırınıñ yañı video klipi taqdim etildi. Klipniñ qaramanları yırcınıñ ömür arqadaşı Seit-Bekir Suleymanov ve oğulları Emir-Rahman ve Selim-Geray olğanlar.
Yırcınıñ matbuat hızmeti Qırım.Aqiqatqa bildirgenine köre, video klipiniñ rejissöri Jamalanen «Krıla» ve «Şlâh dodomu» eserleriniñ videoları üzerinde çalışqan ve Bumboks ve Pianoboy içün klip çıqarğan Anna Kopılova oldı.
«Virü v tebe» («Saña işanam») yırı ösken soñ yahşı insan olacaq balalarğa olğan ümüt aqqında tarif ete. O, özümizge olğan işançımız aqqında da ikâye ete, çünki epimiz biraz balamız. Tüşüngen ve is etken er şey tarif etilgen yırnıñ videosını çıqarmaq pek zor oldı», – dep bildirdi Jamalanıñ aytqanlarını onıñ matbuat hızmeti.
Onıñ bildirgenine köre, «balalarınen vaqıt keçirgen balalarnı köstermek istediler: sportnen oğraşalar, kezeler, yuvalar, aşatalar…».
«Virü v tebe» yırı Jamalanıñ martnıñ 12-nde çıqqan «MI» albomına kirdi. Oña sekiz eser kirdi, hususan «Vdâçna», Agneşka Hollandnıñ «Aqiqat qıymeti» filmi içün Like a Hero yırı ve Qazahistanlı repçi Jah Khalib ile yazılğan «Kohayu» yırı kirdi.
Jamalanıñ matbuat hızmeti, albomnıñ kontsert taqdimi mayısnıñ 14-ne planlaştırıldı, dep bildirdi.
Qırımtatar asıllı ukrainalı yırcı Jamala 2016 senesi İsveçiyada «Eurovisionda» ğalip çıqtı. O, qırımtatar halqınıñ sürgünligini tarif etken «1944» yırını icra etti. Ukrainalı yırcı ğalebe qazanğan soñ 2017 senesi yarış Kyivde keçirilgen edi.
