Qırımtatar asıllı Ukrayına yırcısı Jamala Türk Umay Anaları Birliginiñ türk medeniyetine qoşqan issesi içün mukâfat aldı. Bu aqta o, Facebook saifesinde yazdı.
«Qadınlar arasında türk dünyasına qoşqan issem içün berilgen mukâfat içün minnetdarım. Türk Umay Anaları Birligine icadımnı taqip etkeniñiz içün minnetdarım. Yüregimizniñ bir tarafı quvançnen tolu olsa da, digeri sızlay. Bir vaqıt qolay olmadı, amma yolumnı devam ettirem, ve eyilik qazanacaq, dep işanam», – dep yazdı Jamala.
Jamala Spotify striming platformasınıñ EQUAL leyhasınıñ eñ populâr icracılarınıñ üçüni kirdi. Mart ayında Jamala bu leyhanıñ ambassadorı oldı. EQUAL leyhası qadınlarnıñ muzıka saasındaki aqları oğrunda küreşlerin qoltutmaq içün bar.
Jamala 2014 senesi Qırım işğalini ve Rusiyeniñ Ukrayınağa qarşı büyük istilâsını takbih etti. 2016 senesi Eurovisionda qırımtatar sürgünligi aqqında «1944» yırınen ğalebe qazandı.
Noyabrniñ 29-nda Moskva mahkemesi Rusiye ordusına qarşı «sahte malümat» davasına istinaden Jamalanı ğıyabiy şekilde apiske aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
