Qırımtatar asıllı ukrayınalı yırcı Jamala Ukrayına Mudafaa nazirliginiñ Baş istihbarat idaresiniñ «Qırım» mahsus bölügi erkânında hızmet etken ve bıltır yanvar ayında Bahmut civarında elâk olğan dostu, qırımlı Seyran Kadırovğa bağışlanğan yañı bir yırını taqdim etti.
Yañı yırnı Jamala YouTube kanalında derc etti.
«Müellif bunı is etse, tuş ve bilgisayarı ögünde oturğanda ağlay bilemi? – Ağlar... Men kene böyle oldım. Bir yıl evelsi, yanvar ayında, pek yaqın dostum, ağam vefat etti, amma hatırlavlarım o qadar aydın edi ki, bu yırnı yazmağance ağlap olamadım. «Ağam»... Sevgen, bizni qorçalap can bergen insanlarğa yapa bilecegimiz eñ kiçik şey – unutmamaq, hatırlamaq, olarnı sevmekten qorqmamaq, olarnen bağlı hatırlavlarnı sevmek, şaqa, muzıka zevqlerini hatırlamaq, olarnı aytmaq», – dep yazdı Jamala Facebook saifesinde.
2023 senesi yanvarniñ 21-nde Rustem Umerov Mudafaa nazirligi Baş istihbarat idaresiniñ «Qırım» mahsus bölügi erkânında hızmet etken Seyran Kadırov elâk oldı, dep bildirdi. Yırcı Jamala Seyran Kadırov da onıñ tuvğan köyü Kuçuk Özenden kele, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
