"Serbest Qırımğa mektüpler" teşebbüsi çerçivesinde ukrayin yırcısı Jamala Rusiye akimiyeti tarafından casuslıqta qabaatlanğan qırımlı Leniya Ümerovanıñ mektübini oqudı.
"Şahsen menim içün Leniye Ümerovanıñ ikâyesi - küç ve cesaretniñ örnegidir. Ne içün bu parçanı sayladım? Çünki o, onıñ vatanperverligini köstere. Biz olarnı unutmaymız, olarnı qaytarmaq içün elimizden kelgenini yapamız. Biz küreşmek kerekmiz, çünki olar bizimkiler", - dep yazdı Jamala Instagram saifesinde.
Ukrayina Prezidentiniñ Qırımdaki temsilciligi qayd etkenine köre, teşebbüske er istegen mayısnıñ 19-na qadar Leniye Ümerovağa ya da qanunsız şekilde tutulğan qırımlılarğa Ukrayina tarafdarı olğanları içün mektüp yazıp qoşula bile.
"Menimce, olarğa mektüpler yazmamız pek müimdir, çünki olar destek, yardımnı duymalılar. Bu pek müim. Biz olarnı unutmaymız, olarnı qaytarmaq içün elimizden kelgenini yapamız. Ebet, bu pek tez olmay... Amma men saña pek işanam, Leniye", – dedi Jamala.
"Serbest Qırımğa mektüpler" leyhasınıñ maqsadı - Kremlniñ ukrayinalı esirlerini hatırlatmaq, em de olarğa destek bildirmek. Bundan da ğayrı, mektüpler Rusiye apishaneleriniñ memuriyetlerine er bir Ukrayina vatandaşı müim olğanını ve cemiyet olarnıñ apishanede tutuluv şaraitlerini nezaret etkenini köstere.
2022 senesi dekabr ayında 25 yaşındaki Leniye Umerova Kıyivden Qırımğa ketmege mecbur edi, çünki babasınıñ qanseri bar. Rusiye sıñırcıları Leniye Umerovanı Gürcistan-Rusiye sıñırından keçken soñ rejim alanı qaidelerini bozğanı sebebinden tuttı.
Üç aydan soñ onı yibergenler, lâkin birden Leniyeni polis patruli vesiqaları olmağanı içün tuttı, dep tarif ete ağası. Rusiye mahkemesi onı 15 künge apiske aldı. Soñra Leniyege qarşı daa eki protokol tizildi.
2023 senesi mayısnıñ 5-nde Moskvanıñ Lefortovo mahkemesi Umerovanı casuslıqta qabaatlap apiske aldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
