Qırımtatar asıllı ukrainalı yırcı Jamala qırımlılar içün video muracaatını çıqarıp, olardan karantin vaqtında evde qalmalarını ve onıñ esas şartlarına riayet etmelerini istedi.
«Şimdi epimizniñ karantin şartlarına riayet etmemizni isteyim. Menim içün bu – kerekli yerde maska taqmaqtır. Tınçlıqnı saqlap qalıñız, amma bu sanitar normalarğa riayet etiñiz, rica etem. Böyle yanaşmañıznı isteyim, çünki epimiz bir taqımmız», – dedi Jamala.
Yırcı, bütün dünya aynı vaziyetke oğrağanını hatırlatıp, tınçlıqnı saqlap qalmağa, amma sanitar normalarını unutmayıp, sıq-sıq ellerni sabunnen yuvmağa çağırdı.
«Sizni sevem, qol tutam, er daim yanıñızdam, siziñ içün yırlayım», – dep qayd etti o.
Martnıñ 24-nde Jamala karantin şaraitlerinde online kontsertini ötkerdi.
Aqyarda ilk beş koronavirus hastası qayd etildi, dep bildire martnıñ 27-nde Aqyarnıñ Rusiye ükümeti reisiniñ vazifelerini vaqtınca eda etken Mihail Razvojayev.
Qırım ve Aqyardaki Rospotrebnadzor idaresiniñ yolbaşçısı Natalya Penkovskayanıñ bildirgenine köre, Qırımda martnıñ 27-nde saba yedi yañı koronavirus hastası qayd etildi. Böylece hastalanğanlarnıñ sayısı 14 oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
