Ukrainada sentâbrniñ 6-nda yırcı Jamalanıñ «10» albomı resmiy şekilde yayınlandı. Cıyıntıqqa on yıllıq karyerasınıñ eñ eyi eserleri kirdi. Bu aqta yırcınıñ matbuat hızmeti bildire.
Daa evel «Krıla», «Podıh», Thank You, All or Nothing ve For Every Heart albomlarında çıqqan 22 yır, 1944, Solo, «Zlıva» ve «Zamanili» türküleri kirsetildi.
«10» cıyıntığı – soñki on yıl içindeki ikâyem. Er bir yıl – menim quvanç, sevgi ya da yaşağan dramamnıñ küçük ikâyesidir. Er biri menim içün müim. Menim kâinatım olardan ibaret, ayatımnıñ pazlı toplana. Diñleyicilerimniñ yüreklerine sıcaq, samimiylik, açıqlıq parçası tiysin isteyim», – dedi Jamala.
Haber etilgenine köre, küzniñ soñunda cıyıntıqnıñ vinil versiyası çıqacaq, anda tek on yır kirsetilecek.
Daa evel Jamala Ukraina şeerleri boyunca üç aylıq turnıñ künlerini ilân etken edi.
Hatırlatamız, mayısnıñ 22-nde Jamalanıñ Solo yırı videosınıñ premyerası oldı.
Qırımtatar asıllı ukrainalı yırcı Jamala 2016 senesi İsveçiyada «Eurovisionda» ğalip çıqtı. O, qırımtatar halqınıñ sürgünligini tarif etken «1944» yırını icra etti. Ukrainalı yırcı ğalebe qazanğan soñ 2017 senesi yarış Kyivde keçirilgen edi.
