Qırımtatarı olğan ukrain yırcısı Jamala noyabr ayında Ukrainanıñ büyük şeerleri boyunca tur yapıp, yañı «Qanatlar» («Krıla») albomına qoltutacaq ola. Yırcınıñ matbuat hızmeti bildire ki, tur noyabrniñ 14-nde Dniproda başlap, sekiz şeerni qaplap alacaq.
«Kontsert programması ilk evelâ yañı albom esasında tertip etilecek. Faqat yañı yırlardan ğayrı, kontsertlerde evelki albomlarnıñ populâr türküleri ve Stokgolmde «Eurovision-2016» ğalibi olmağa yardım etken «1944» yırı yanğıraycaq», – dep aytıla ilânda.
Jamalanıñ yañı «Krıla» albomını cuma künü, sentâbrniñ 28-nden, başlap iTunes Store, Apple Music ve Google Play ilâvelerinde sımarlamaq mümkün. Albomnıñ resmiy numayışı oktâbrniñ 12-nde olacaqtır.
Jamalanıñ «Krıla» yırına çıqarğan yañı klipi sentâbrniñ 12-nde taqdim etildi, bugünge qadar video 1,2 mln kere baqıldı. Klip rejissöri Anna Kopılova oldı. O, Jamalanıñ «Şlâh dodomu» videosı üzerinde çalışqan, em de Bumboks ve Pianoboy içün video çıqarğan edi.
Jamalanıñ evelki «Sumuyu» yırı 2017 senesi sentâbr ayında çıqqan edi. Anda bu eserden ğayrı «Lübıtı» türküsi de kirdi.
Jamala «Tı lübov moya» yırını da icra etti. Bu türkü «Vıkradena prıntsesa: Ruslan i Lüdmıla» ukrain mültfilminiñ finalında yanğıray. Film martnıñ 7-nde taqdim etildi.
