Kyivde noyabrniñ 30-nda qırımtatar asıllı ukrain yırcısı Jamalanıñ 10 yıllıq icadına bağışlanğan kontsert olıp keçti. Yırcı, Qırım.Aqiqatqa izaat berip, çıqış ve icadiy yolu teessuratlarını paylaştı.
«Yapqanımdan zevq duyam… İlk evelâ mennen, içimde, öskenimnen, insan, muzıkant, ana olaraq deñişmelerimnen rezonans etken muzıkanı yapam. Er şey toplana. 10 yıllıq icat – yırlarnıñ müellifi olğan meni, deñişkenimni qayd etti», – dedi Jamala.
Onıñ qayd etkenine köre, o, artıq Smile yırını icra etmey.
«Meselâ, Smile yırını endi yırlamayım, çünki maña endi kelişmey. Onı sevdim, amma östim, anter kibi. Bugünki kontsertte cevap bere bilecek yırlarımnı topladım», – dep qoştı yırcı.
Jamala, 2016 senesi İsveçiyada «Eurovisionda» ğalebe qazandı. O, qırımtatar sürgünligi aqqında «1944» yırını icra etken edi. Ukrainalı yırcı ğalip çıqqan soñ 2017 senesi yarış Kyivde keçirilgen edi.
