Qırımtatar asıllı ukrainalı yırcı Jamala mayısnıñ 15-nde Hersonda 1944 senesi Qırımdan qırımtatarlarnıñ sürgün etilüvi qurbanlarınıñ hatırasına bağışlanğan añma abidesine çeçekler qoyıp, bu künleri balalarınen beraber yarımadada olamağanı içün yazıqsınğanını bildirdi.
Bu aqta Jamala mayısnıñ 15-nde Hersonda «Hatırlaymız» 1944 senesi mayısnıñ 18-nde qırımtatar halqı sürgünliginiñ qurbanlarını añma aqşamında iştirak etmezden evel «Suspilne Herson» jurnalistlerine ayttı.
«Şimdi balalarımnen barmağa imkân olmağanı içün pek yazıq… Qırımda, balalığımda olğanı kibi, Aqmescitte meydanda toplaşqan edik. Bu bir hatıra aqşamı edi, qorantalarnıñ körüşüvi. Yaramay bir şey olmadı, provokatsiyalar olmadı, şimdi bu aqta aytalar. Bu ğayıp olğan ikâyelerni aytqan insanlarnıñ körüşüvi edi», – dep ayttı yırcı.
Jamala, facia qorantasına nasıl tesir etti ve tuvğanlarınıñ sürgünlik aqqında tarif etkenlerini ikâye etti.
«Qartanam balalarınen Qırımdan Orta Asiyağa yük vagonlarında sürgün etildi. Yolda eñ kiçik qızı, adı menim kibi Susanna edi, can berdi. Qartanam onı yolda defin etmege rica etti, bunı kimse yapmadı, ölülerni taşlap kete ediler. Bu ikâyeni balalığımdan berli eşitken edim. Sofra başına oturğanda ya da qorantanen toplaşmağa imkân olğanda bunı ne içün hatırlağanımıznı añlamağan edim. Şimdi bunıñ qıymetini bilem, çünki maña bu ikâyeni tarif etken ne qartbabam, ne qartanam bar», – dedi Jamala.
Hersonda mayısnıñ 15-nde 1944 senesi mayıs 18 qırımtatar sürgünliginiñ qurbanları hatırasına «Hatırlaymız» añma aqşamı keçirile. Tedbirde qırımtatar asıllı ukrainalı yırcı Jamala, «Dahabraha» ukrain etno-gruppası, qırımtatar horeografik taqımları iştirak ete.
Merasimni «Küreş» qırımtatar medeniy merkezi», «GOGOLFEST», USAID halqara inkişaf ABD agentligi ve «Nova ğeneratsiya» teşkil etkenler.
Qayd etilgenine köre, tedbir Ukraina Sağlıq nazirliginiñ koronavirus pandemiyasınen bağlı sıñırlavlarğa uyğun şekilde keçirile.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
