Qırımtatar asıllı ukrainalı yırcı Jamala avgustnıñ 28-nde Kyivde doğğan künü munasebetinen olacaq kontsertine davet ete.
«Sizni Nebatat bağçasında olacaq kontsertime davet etem! Doğğan künümni siznen beraber kontsertinen qayd etmege pek isteyim. Uzun karantin aylarında ğam ve qasevetten ketmege aqqımız bar», – dep yazdı Jamala Instagramda.
Jamalanıñ matbuat hızmeti bildirgenine köre, Jamalanıñ open-air kontserti – ekinci oğlu Selim-Geray doğğan soñ ilk büyük çıqışıdır.
«Em de Jamala COVID-19 pandemiyasınen bağlı karantin başlağanından berli mühlisleri ögünde ilk sefer çıqışta bulunacaqtır. Açıq avada olacaq kontsert içün Jamala romantik yaz eserlerinden ibaret mahsus programmanı azırladı», – dep aytıla haberde.
Jamalanıñ qayd etkenine köre, koronavirus pandemiyasınen bağlı sıñırlavlar sebebinden eñ çoq artistler zarar körer.
Onıñ fikirince, online rejimde kontsert artistlerge canlı kontsertler vaqtında insanlarnen olğan bağını berip olamaz. Qıyınlıqlarğa baqmadan, Jamala karantin vaqtında taqımından kimseni işten boşatmadı, dep bildire.
Karantin sebebinden çoqusı artistniñ muzıka faalligi İnternetke keçti. Martnıñ 24-nde Jamala online kontsertini berdi. Yırcınıñ resmiy Instagram ve Facebook saifelerinde canlı yayın oldı.
