Qırımtatar asıllı ukrayinli yırcı Jamalanıñ Qırım albomındaki Arafat dağından eski mistik halq yırınıñ klipi Megogo Music Awards versiyasına köre «yılnıñ klipi» mukâfatını aldı.
«Videonıñ açıq bir şekilde pek yahşı rejissörlar çıqarğan diger pop-hitlernen yarışlaşqanı acayip bir şey. Bu tek menim içün degil, umumen ukrayin muzıkası içün bir vaqia, dep tüşünem, çünki qırımtatar tilinde bir yır, bir dane bile suniy alet yazılmadı, em de 6:28 daqqada. Bu büyük bir vaqia, kerçekten», – dep yazdı yırcı Facebookta.
Klip müellifi rejissör German Nenov oldı.
Teşkilâtçılar qayd etkenine köre, neticeler diñleyicilerniñ bahşışları (25%), diñleyicilerniñ reyleri (25%) ve jüri baalarını (50%) esapqa alğan formulağa köre belgilendi.
«ARAFAT DAĞINDAN – Aqmescit (Simferopol) şeerinden eski bir halq yırı, altı daqqalıq videosı qırımtatar halqınıñ tarihına ve Jamalanıñ şahsiy tarihına ait añlatmalarnen tolu», – dep qayd etti Megogo.
Bundan evel Jamala 2024 senesi Taras Şevçenko milliy mukâfatnıñ laureatı oldı. Yırcı Qırım albomı içün mukâfatqa nail oldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
