Qırımtatar asıllı ukrainalı yırcı Jamala Ukrainağa qoltutmaq içün hayriye kontsertlerinen 90 million dollar topladı. Bu aqta Forbes neşiriniñ maqalesinde aytıla.
«Bu çoq insannıñ ğalebesidir. Teşkil etken, para toplap yollağan, bilet alğan, maddiy yardım köstergen er keske minnetdarım. Ayatımda eñ çoq sevgen işimni yapa bilgenim ve aynı vaqıtta Ukrainağa yardım ete bilgenim içün minnetdarım. Toplanğan para çeşit Ukraina ve UNICEF, ARD kibi halqara fondlarına ve başqalarına kete. Teşkilâtlar ise olarnı ukrainalılarnıñ ihtiyaclarına yollay», – dep yazdı Jamala Facebook saifesinde.
«İzvestiya» Rusiye neşiri bildirgenine köre, Jamala Rusiyege kirişi 50 yılğa yasaqlanğan Ukraina artistleri cedveline kirsetildi. Rusiye uquq qoruyıcı organlarınıñ izaatları daa yoq.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
