Bazarertesi künü, fevralniñ 10-nda, qırımlı ukrain yırcısı Jamala «1944» yırı içün YUNA «20 yılnıñ 20 müim yırı» mukâfatını aldı, dep bildirdi. Bu aqta o, Facebook saifesinde yazdı.
«20 yılnıñ tek 20 yırını saylap almaq pek qıyın, dep tüşünem. Bu vaqıt devamında insanlar sevgen bir çoq müim yır yazıldı. «1944» türküsiniñ bu cedvelge kirmesi menim içün pek müim ola. Elbette, anda em «Zaplutalas», em «Şlâh dodomu», em «Çomu kvitı mayut oçi», em… belki, bütün yırlarnıñ kirmesini ister edim», – dep yazdı yırcı.
O, «1944» yırı onıñ içün er vaqıt ayrı oldı ve olacaq, dep qayd etti ve onı añlağan ve qoltutqan er keske teşekkürler bildirdi.
«Añlağan er keske minnetdarım. Meni daa yahşı ve sesli yırlamağa zorladıñız! YUNA bu şeref ve işanç içün sağ olsun. Ukraina muzıkasınıñ tarihında qalacaq yırlarnı yazmağa tırışacam», – dep ayttı Jamala.
Hatırlatamız, fevralniñ 7-nde qırımlı ukrain yırcısı Jamala ve hip-hop icracısı Alyona Alyonanıñ «Jali» yırınıñ klipi çıqtı.
Dekabrniñ 20-nde Jamala ve Alyona Alyonanıñ «Zabıray» klipi çıqtı. Yırnıñ mevzusı kiberbulling oldı.
Jamala ve repçi Jah Khalibniñ «Kohayu» çifti Yuna muzıkalı mukâfatına namzet kösterildi.
Qırımtatar asıllı ukrainalı yırcı Jamala 2016 senesi İsveçiyada «Eurovisionda» ğalip çıqtı. O, qırımtatar halqınıñ sürgünligini tarif etken «1944» yırını icra etti. Ukrainalı yırcı ğalebe qazanğan soñ 2017 senesi yarış Kyivde keçirilgen edi.
