Qırımtatar asıllı ukrain yırcısı Jamala ukrain tibbiyet hadimlerine qol tutmaq içün Instagramda aktsiya başlattı.
Yırcı urbalarını satıp, bu parağa ekimler içün qoruv qıyafetini satın almağa qarar aldı.
«Evde oturğanda aqlıma böyle bir ğaye keldi. Urbamnı ekimler içün qoruv qıyafetlerine deñiştirmege isteyim! Urbalarımnı paylaşacam. Olarnı satın ala bilesiñiz, ümüt etem ki, sizni quvandıracaq. Karantin biter, güzel ve kerekli urbalarıñız qalır! Eyilik yaparsıñız – ekimlerni qoruv qıyafetlerinen temin etmege yardım etersiñiz», – dep yazdı Jamala.
Karantin sebebinden Jamalanıñ faalligi internetke keçti. Martnıñ 24-nde Jamala yırcınıñ Instagram ve Facebook resmiy saifelerinde yayınlanğan online kontsert yaptı.
Yırcı, qırımlılarğa videoda muracaat etip, karantin vaqtında evde qalmalarını ve onıñ esas şartlarına riayet etmelerini rica etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
