Halqara uquq mütehassısı Boris Babinniñ fikirince, Rusiye prezidenti Vladimir Putinniñ işğal etilgen Qırımdaki topraq mal-mülki aqqınen bağlı buyruğından soñ Kreml kontrolindeki yarımada akimiyeti topraq damartılarını tutıp ala bile.
Böyle fikirni Babin martnıñ 25-nde Qırım.Aqiqatqa bildirdi.
«Rusiye boyunca umumiy tedbirlerdir. Sıñırdaki rayonda yaşasañız, anda böyle bir yasaq bar. O, avtomatiktir. İlhaq ıntıluvından 5 yıl keçken soñ, Rusiye bu normanı Qırımğa da tarqattı. Mesele şu ki, anda topraq damartıñız olsa, onı musadere etecekler ya da saiplerinden zorlap alacaqlar», – dedi Babin.
Onıñ fikirince, Qırımnıñ Rusiye akimiyeti saiplerniñ toprağını tutıp almaq içün eki variantnı qullana bile.
«Birincisi – saibi sahte Rusiye vatandaşlığı olmağan şahıs ya da şirket ola bile. Mında er şey zaten añlaşıla. Ekincisi – insannıñ sahte pasportı olsa, amma birisi onıñ topraq damartısını pek begense, apansızdan onıñ qanunsız olğanı ortağa çıqar. Ya da şirket olsa, apansızdan qanunsız ğayrıdan qayd etildi dep çıqar. Er şey bu yıl başlar, dep tüşünem», – dep qoştı Babin.
Vladimir Putin martnıñ 24-nde topraq damartıları «çetel vatandaşları» ve «çetel şirketlerine» ait olamaycaq topraqlarnıñ cedvelini kenişletti. Cedvelge işğal etilgen Qırım ve Aqyarnıñ çoqusı rayonları, Keriç, Yalta, Kezlev ve diger yalı şeerleri kirdi.
Yasaq Qırımnıñ üç regionına tesir etmey – Curçı, Qurman ve Qarasuvbazar rayonına, olarnıñ esas Ukraina ile sıñırı ve Qara deñizge çıqışı yoq. Cedvelge Aqyarnıñ Nahimov rayonındaki Duvanköy (Verhnesadovoye) köy şurası da kirmedi.
Ukrainanıñ «Sluğa narodu» («Halq hızmetçisi» – QA) fraktsiyasınıñ halq deputatı Vitaliy Bezgin Ukraina icra akimiyetiniñ vekillerine deputat muracaatını yollap, Rusiye prezidenti Vladimir Putinniñ işğal etilgen Qırımda topraq mal-mülki aqqınen bağlı buyruğına cevap bermege çağırdı. Cevap daa yoq.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
