«Asker» cemaat birleşmesiniñ başı Lenur İslâmov, Qırımda rusiye quvetçileri “İslâmovnı qaravulı” dep yaqalağan adamnı tanımağanını iddia etti. Bunı İslâmov yanvar 23-ünde ATR qırımtatar kanalına aytıp berdi.
“Men onıñ kim olğanını bilmeyim, onı iç körmegen edim. Anda nasıldır adamlar tutılıp alınsa da, men içün olar sadece qırımtatarlar. Qırımda batalon azaları yoq… Men bu adamnı tanımayım”, - dedi İslâmov.
Rusiye FSB-siniñ Qırım idaresiniñ hadimleri, «Asker» cemaat birleşmesiniñ başı Lenur İslâmovnıñ “şahsiy qaravulı” olğan qırımlını tutıp alğanlarını iddia ete. Rusiye quvetçileri o adamnıñ adını bildirmey.
Haber etilgeni kibi, FSB Rusiye Ceza kodeksiniñ 208-inci maddesiniñ 2-nci qısmına istinaden (qanunsız silâlı birleşmede iştirak etüv) cinaiy iş açtı. Şübheli olğan kişige sıñırlav tedbiri saylanmaqta.
Yanvarniñ 23-nde haber etilgenine köre, Qırımda «Noman Çelebicihan ukrain batalyonınıñ iştirakçileri» qayd olğan adreslerde tintüvler keçirildi. Daa soñra belli oldı ki, Qırımdaki Rusiye FSBsi «Asker» cemaat birleşmesiniñ vekili Evelina Arifova ve qırımlı Bekir Abultarovnıñ evlerini tintti.
2018 senesi noyabr ayında advokat İslâm Velilâyev bildirdi ki, Qırımda «qanunsız silâlı birleşmelerde» iştirak etüv içün cinaiy taqipler çoqlaşa bile.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Qırımtatar Milliy Meclisi, bu meselenen bağlı bütün malümat Ukraina prezidenti Petro Poroşenko ve İç işler naziri Arsen Avakovğa berildi, dep qayd etken edi.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
