Rusiye lideri Vladimir Putin, ABD prezidenti Donald Trampnı Ukrayinasız eki taraflı muzakerelerge celp etmek, Trampqa muzakerelerniñ istenilgen çerçivesini zorlamaq ve onı, Rusiyeniñ şimdiki ukrayin ükümetiniñ qanunsızlığı aqqında beyanatlarına qol tutmağa mecbur etme ıntıluvlarğa devam ete, dep yaza cenkni ögrenüv Amerika institutı (ISW) öz esabatında.
"Putinniñ yanvarniñ 28-nde yapqan beyanatları, özüni Trampnıñ musaviy olaraq köstermek ve Rusiyeniñ Sovetler Birliginiñ mirasçısı olğanına inanğanını pekitmek içün yapılğan devamlı ğayretlerniñ bir qısmıdır. Putinniñ beyanatları Rusiyege, Trampnıñ yardım ete bilecek Ukrayina ile kelecek barışıq añlaşmalarını bozmağa imkân bere ve Putinniñ barışıq şartları olaraq rejimni deñiştirmek ve ukrayin ordusını küçlerinden marum etmek talapları boyunca uzlaşmağa istemeycegini köstere", — dep aytıla haberde.
ISW qayd etkenine köre, Putinniñ bu kibi ıntıluvları "Rusiyeniñ Ğarpnı şimdiki ukrayin ükümetiniñ qanunsızlığı aqqında Rusiye beyanatlarını qabul etmege mecbur etmek ıntıluvlarınıñ bir qısmıdır".
"Putinniñ eski ğalebe nazariyesi, Ğarpnıñ Ukrayinadan çıqması ile bağlı, ve yalıñız Ğarpnıñ deñişmez destegi ve Kıyivge Ğarpnıñ arbiy yardımınıñ ardı-sıra berilmesi, Putinni öz nazariyesinden vazgeçip, çatışma al etilmesi içün kerek olğan ve Amerika Birleşken Devletleri, Avropa ve Ukrayina içün maqbul olğan imtiyazlarnı teklif etmege mecbur ete bile", — dep aytıla haberde.
ISW qayd etkenine köre, tek ABD Ukrayinağa kritik silâ ve arbiy tehnikanı "Ukrayinanı Rusiyeden qorçalamaq içün kerek olğan mıqyas, tezlik ve muntazamlıqnen" temin ete bile, dep tüşünmege devam ete, ğarbiy memurlar ise yaqında Avropa devletlerine ABD-ne Ukrayinağa arbiy yardımnı maliye etüvde yardım etmekni teklif ettiler.
Rusiye prezidenti Vladimir Putin yanvarniñ 28-nde Ukrayina prezidenti Volodımır Zelenskıy ile barışıq muqavelesini imzalamağa azır olmağanını bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
