Rusiye Federatsiyasınıñ prezidenti Vladimir Putin Rusiye ordusınıñ imkânlarını kene büyük körip, Donetsk ve Lugansk vilâyetleriniñ topraqlarını mart ayına qadar zapt etmege emir berdi. Bu aqta Amerikanıñ cenkni tedqiq etüv institutı esabatında aytıla.
«ISW, Rusiye quvetleri Ukrayına şarqında Ukrayına quvetlerini yeñmek ve, Putin emir etkeni kibi, mart ayına qadar işğal etilmegen Donetsk vilâyetiniñ 11 300 metr kâresinden çoq (Donets vilâyetiniñ 42 fayızından ziyadesi) topraqnı zapt etmek içün yeterli uruş küçüni ğayrıdan tiklegeniniñ delillerini körmedi», – dep aytıla haberde,
«ISW, Rusiyeniñ büyük ücümi 2023 senesiniñ aprel ayına qadar, aprelniñ baar yağmurları (daa evel olmasa) mevsiminde bitecektir, dep tahmin etken edi. Rusiye quvetleriniñ külminatsiyası Ukrayına quvetleriniñ 2023 senesi baarniñ soñunda ya da yazında ğarbiy tanklar kelgen soñ qarşı ücümde olarnı qullanması içün yahşı şaraitler yarata bile», – dep qoştı talilciler.
Kreml yolbaşçısı Vladimir Putin mart ayına qadar Donetsk ve Lugansk vilâyetlerini zapt etmege emir bergenini Ukrayına Mudafaa nazirliginiñ Baş istihbarat dairesiniñ vekili Andriy Çernâk bildirdi.
«Rusiye işğalci ordusı şarqqa doğru qoşma ücüm gruppaları, bölük, silâ ve arbiy tehnikasını ketire. Ukrayına arbiy istihbaratınıñ malümatına köre, Putin mart ayına qadar Donetsk ve Lugansk vilâyetlerini zapt etmege emir berdi», – dep qayd etti o.
Bundan ğayrı, istihbarat vekili Rusiye Rusiye seferber etilgen askerlerni azırlamaq içün Beyazrusiye topraqlarını qullana ve yaqın aftalarda ücümni başlatmaq içün yeterli küçke saip degil, dep qayd etti.
«Beyazrusiyeniñ Rusiye tarafında Ukrayınağa qarşı büyük istilâğa celp etilüv telükesi yoq, amma, şübhesiz, bunı esapqa almalımız», – dep qoştı o.
Donetsk ve Lugansk vilâyetleri eñ deşetli uruşlarnıñ rayonları arasında qala. Ukrayına Silâlı quvetleriniñ Baş ştabı fevralniñ 3-nde saba Mudafaa quvetleri Donbasta 10 mesken yerniñ yaqınlarında Rusiye ücümine qarşı çıqtı, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
