Uydu resimleri 2023 senesi dekabr ayınıñ soñunda Ukrayinanıñ Qırımğa endirgen darbeleri Aqyar civarında Rusiyeniñ "Tarantul" korvetini batırğanını tasdıqladı, dep aytıla Amerika cenkni ögrenüv institutınıñ (ISW) esabatında.
Yanvarniñ 18-nde "Ateş" Qırım partizan areketi, Aqyarnıñ Graf körfezinde batqan "Tarantula" korvetini tapqanlarını bildirdi ve "Ateş" bergen koordinatlarnıñ uydu resimleri korvet 2023 senesi dekabrniñ 28-nden 31-ne qadar batqanını tasdıqlay.
ISW qayd etkeni kibi, ''bu daa evel belli olmağan muvafaqiyetli ukrayin ücüminiñ tasdıqlanması, Ukrayinanıñ işğal etilgen Qırımdaki muvafaqiyetli ücüm kampaniyası açıq menbalar tarafından tasdıqlanğanından daa muvafaqiyetli ola bile''.
Qırımdaki Rusiye memurları, 2023 senesi dekabrniñ 28 ve 30 künleri Rusiye ordusı Aqyarğa ukrayin ava ve deñiz uçucısız uçaqlarınıñ ücümlerini keri çekti, dep iddia ete ediler.
2023 senesi dekabr 26-da ukrayin quvetleriniñ Qırımdaki Kefe limanına ücüminden soñ, ukrayin tarafınıñ malümatına köre, Rusiyeniñ "Novotserkassk" desant gemisi yoq etildi. Yarımadanıñ Rusiye akimiyeti ücüm neticesinde bir adamnıñ elâk olğanını resmiy şekilde tasdıqladı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
