Türkiye şeerlerinde biñlernen insan soqaqqa çıqıp, prezident Recep Tayip Erdoğannıñ esas siyasiy raqibi İstanbul büyükşeer belediye başı Ekrem İmamoğlunıñ tutulğanına qarşı narazılıq bildirdi. Polisniñ narazılıq bildirgenlerge qarşı mahsus vastalar qullanğanı aqqında haberler bar.
İstanbulda şeer yolbaşçılığı, İmamoğlu evindeki tintüvlerden soñ ketirilgen polis bölügi, tutulğanından bir kün evelsi diplomını lâğu etip, prezident vazifesine namzet köstermek imkânından marum etken universitet binası ögünde aktsiyalar keçe.
Universitet binasında toplaşqan studentlerge qarşı polis hadimleri mahsus vastalarnı qullandı, dep bildire kütleviy haber vastaları.
Şeer yolbaşçılığınıñ binası ögünde Ekrem İmamoğlunı prezident vazifesine namzet kösterecek olğan muhalifet Cumhuriyet Halq firqasınıñ lideri Özgür Özel çıqışta bulundı. Özel İstanbul büyükşeer belediye yolbaşçısınıñ tutuluvını devlet darbesi ıntıluvı olaraq adlandırdı.
İstanbulda numayış ve miting yasağı devam ete. Buğa baqmadan, narazılıqlar devam ete, diger şeerlerde, hususan paytaht Ankarada da aktsiyalar keçirile.
Türkiye akimiyeti martnıñ 19-nda saba İstanbul büyükşeer belediye yolbaşçısı Ekrem İmamoğlu ve taqım azaları – İmamoğlunıñ mesleatçısı ve Medya AŞ idarecisi Murat Ongun ve İmamoğlunıñ saylavaldı kampaniyasınıñ reberi Necati Özkannı – «kâr qazanmaq maqsadınen cinaiy teşkilâtnı qurğanında» qabaatlap tuttı.
Daa 100-den çoq insannı tutuv qararı çıqarıldı. Türkiye Adalet nazirligi davanıñ siyasiy sebepleri yoq, dep israr ete. İstanbul yolbaşçısı taqip etilgenini halq iradesine darbe dep adlandırıp, narazılıqlarğa çıqmağa çağırdı.
İmamoğlu 2019 senesi mart ayından berli İstanbul şeer yolbaşçısı ola. O, şimdiki prezident Recep Tayyip Erdoğannıñ esas raqibi sayıla.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
